PATHIAN NING AKUI PASTOR

    By: Rev. Semi Serto Executive Secretary, ABA

    Mi ankhat hi atiir an ommak inko atak-in man aram rahut-a chongchoi (palai) ankhat anga ram dang nga ache rang hi anitor lui ang nga mi ankhat hi Pathian ning kuina omlui-a Pastor changrang hi Bible in anaman jet na nuk jui-a ko adik lui ani. Ama ankuinaha hong ang mo akui hana hava ha athiang nga ajet ranghi alut tak ankhat ani. Puma atak ngaaimi rakip hi Puma Chuan (sepa) tho rang ani tia Bible in annamanjet jui tak aninom atak ngaai mi rakip ngaaihi pastor changna ranga etik am Pathianin kuimak. (Ephesians 4: 11, 12) atak ngaai mi rakip Puma taksa ansin abahk ankha-khat a Puma chuan (sepa) thorang suok antinum, Pathian belram ngaai vairang, manjetrang hana athiang ngaai Ratha/Thavahng lamma sinrang hiko Pastor chuan ani.
    Pathianin atak ngaai mi ankhat hi Puma chuan (Sepa) thona ranga akui pha aman hava ha ajui mak inko lungpohngna ankhat ani. Mi ankhat in Pathian kuina rasa ajet jui tak aninum aman hava han chemak narang atho hako, atak ning ataksa ha akanpehk sot-a Puma lamkeina thuaija a om johtlui jaarra ani. Man hangan athoa Ratha/Thavahng thiang amanpong jarra tanti akantong pui ke.
    Puma chuan thorang nga lungluht asang tak anei mi ching ngai, lairik athei ngaai jak in Pathian ning athang suak nimak, Pathian chong sat riman thang rang nga kuina adang ankhat hi va khella alian kuina ramual chung nga omlaimak. Hanna Pathian nin ramual chung mi a amin ramual chung nga arahtmi achingngaai Manchu narang nga athaang ani. (1Cor. 1: 27) hanna miring in Pathian jiang atak-sa lung, hanna angaaidonna apehk soht ah Puma jiang a om ma Puma Chuan (Sepa) atho le jak Puma a anphut phual amurang ani. Athuai anpehk ngaai anphut avier enrei:
    1. Pathian nin athiang nga akui chiak rang hi angaai ani.
    O.T le N.T. Lairik anni yah in Pathian in ama chuan rang nga ama ami ngaai akuina jetrang a om atam kanmu. Aninom N.T. Phat a akuina ngai hako adang khat a ani. Ratha/Thavahng kutchoi rakip aram ramma a om Biakrup ngaai liansoht kansohn narang nga, atak ngai ngai jiang puman apehk ani ti keinin kanmu. Acts 9: 15 1Cor. 9 :14-15 hava jarra Pathian chongsat hi rimanthang narang nga miring ankhat ringkhua va, chungvan na anphut athiang nga akuina a om chiak ranghi angaai ani.

    CHUNGVAN NA ANPHUT ATHIANG NGA AKUI NGAI JETNA NEIRANG

    Hiva hin chong ding kel jot ankhat aom mi angkhat in hoganmo Pathian in ama Chuan (sepa) thorang nga anakuijui tihi ajetrang?

    1. Atak a ataksa ngaidonna:

    Mi ankhat hi adik tak ah Pathian in akui inko ama ringkhua atak sa ning atak sa ha Pathian ta anijui (Pathian nai kanijui tihi ngaidon nahi a om chiak rang ani) ajarko Pathian ning ama hava ha aman jet ani.

    1. Asat Chongha Phuongsoht na anei.

    Thiamruai Pual ning ati, kei ning asat chongha kaphuang soht mak inko kei ranga pongna achang (1Cor. 9: 16) Hiva hin keinin kanjetor hava hako mi ankhat in Pathian in akui inko ha anphut amai suak akan heiya tahntor noning. Ajaarako hava jaarra achung nga asiak pejui ani.

    1. Midang ngaai ngaaidonna:

    Ratha thiang in hava mi chung chang nga mi dang atak ngai ngai lungnga suailuiya chong phuang perang ani. Jetnarang angkhat ah kanti inko Paul in Timothy akuina chung chang a hanna Eli’n Samuel akuina chung nga Ratha thiang in amajiang aphuongsoht pena jaara anjet. (1Tim. 4: 14; 2 Tim 1: 5)

    Pastor chuan 

    Pastor chuan hi mingai inko ijom anilui chuan ke pohngna chuanke tia abeichek a an-ngaaidon. Tak-ha hiva hi Pathian tiang nga ko chuan alian tak chuan arik tak ani.

    1. Hivahi Chuan alian hanna athiang athiang nga akuina ani. Pathian Chuan (sepa) thonarang nga akuina ani. (Acts 20: 11)

    2. Hiva hi kuina angar tak ani. Pathian na anphut ranak raht angai…. (Ephesians 6: 10) Zechariah 6: 4)

    3. Hiva hi ahuiya ana kuina angkhat ani. Ajaarako aman puma rahut athuhl ani. (Matt. 28: 20)

    4. Hiva hi chit jak na a om tak kuina ani. (2Tim. 3: 1-2)

    5. Pastor hi Pathian rahut thuhlla Khrista chongchoi (palai) hanna Ratha thiang neimanna ani.

    © 2017 Aimol Baptist Association. All Rights Reserved. Support by Lunglai Services!