PATHIAN PHUAL SAT LE RASISAT

    By: S. Shangkai Former Assembly President, ABA
    Simlei chung nga kanring kaarje rahuisuak aliantak hi Rasisat/ Ravaansat antihi ani. Hiva rasisat antihi honna avakanthui? Tuning mo inapehk? Tihi asat-a jetrang angai. Nangko narasi asat, keiko karasi asiat, hiva chongramal annihi honna ahongkan thuimo? Tuningmo Rasisat animakle rasisiat inamanchang tokrang asuak hale jetkhet rang asuak. Kanrasi asatle Pathian kanmanpaak, asiat le Pathian lam nowntaak kanpehk. Oh; Rammual omchan ani. Anapehktor Pathian anijaara ama kannown ani. Hanna Chongthiang rabu-a Puma Pathianko Phual apehk karra mi akhuithiar (Michang mikha anai) tihiko kantong puimasing ti ajowt, hanna miring ngai nanchuan thona nukjuija ara nankhowm rang ani.

    Hale keining miring ngai anchuan nukjuija kimalerang ani, tihiko kankantongpui. Hiva ‘Rasi’ antihi Pathian ama anphut Phualsat muhan rasisat antiha kanchangrang ani. Hanga aninko hiva Phualsat hi tumnarang imo kanthorang tihi maan jet khetrang angaai. Hiva Phualsat muna hi Ruphai sana kannei et-a aman kantelrang changma, kanching kanvaar, hale kanranak raat han kanmurangom nima. Hiva Phualsat muna hi amasat-a saapchonga kantile “Grass root level” anti anga aniamkuk-a ahong kanphutna hi kantak chung nga, kan innsuhng paal han ivakanthuirang ani. Innsuhnga Pa chonghan Nu chongha ahip adaija akan angrip-a paalpui rang, eshelluirang, Nu changhan nom Pa chongha chitle jak neirang. Naai ngai ha Pathian lam manjet khatrang, Tarpu tarpi chonghan kan maak manmui ngaiha kannai tak anga kan lungman siatrang. Maak mui ngainnom kan Tarpu kantarpi ha kanpa kanu tak anni tia kanlung siattor rang. Kan innri kan inn taangle lungthiang hiaija kantowp torrang, khodevan, sopa kaara kansuak kaara mi rakiple kanjoth theirang, kein kijet han atorna ani, adikjui tiluirang. Mining keihi imo annatirang tia ngadonna chong rirang, chuan varrang. Mi lungnatna tholuirang. Adadang kanthomakma hivalim hi thobak juitor bak direi. Han imo achang enrei. Han animak inko phualsat mului kanvachangrang. Rasibui antiha kanirang anijui. Hanko adik Pathian ha mikhuithiar Pathian tia nowntaak kanvapehk ani. Atorna ta-a “Pathian kanchellui ringkhuo kolung ngam nabui ringkhuo ani” (Life without God is life
    without hope” anti hi theinimarei.

    © 2017 Aimol Baptist Association. All Rights Reserved. Support by Lunglai Services!