Adik Tak-Ngai

    Adik Tak-Ngai - Aboi Lunglai

    Tak-ngai buiya sapthiang changna jotmak. Tak-ngai buiya sangram manrit-a ringchunna jotmak. Tak-ngai buiya adik Church omngaimak. Adik tak-ngai buiya adik Sanringpa jetna jotmak. Greek chong ‘pisteuw’ tihi Johon ning Johon 3:36 han aneiman. 

    "Anai (Puma Jisu) jiang tak angai mihan amonglui ringna aneijui: hale Anai (Puma Jisu) jiang tak angailui (adaa) mining ringna munoning; taak ha Pathian lungthakna amachunga aom thengpet. (Johon 3:36). 

    ‘Pisteuw’ aratha enrei:
    - jetchiak-a kanpeksot
    - adet-a chongjui
    - keichi kei-ohk omluiya tak ngai
    - lungsuk ngailui

    Kanininga kakan huanga Christian kani katinomke, hiva tak-ngai hi kanei maknukko tharra nai lachang making.

    Hiva tak-ngai hi kanei mak nukko Christian nimaking. Amelpuah jak ha kani. Mathiu 7:21.

    Kanininga kakan huanga Christian kani katinomke, hiva tak-ngai hi kanei maknukko tharra nai lachang making. Christian tihi Pathian lah tho, Church a chuantho, ministry chuantho, Chritian leader chang, church membership, tuilut, sialle-sum pek, etc. ngaihi adik Christa-jui-mi (Christian) tina jotmak. Ajaarko Christa juiluiya hiva ngailimhi tho ajot. Puituk (perfect) ko nimashing, taak ha chongjui hale chet-a tak-ngai tihi Christian ringkhuawa omak jot mak. Tak-ngai alulet chonghi ‘tak-ngailui’ kanti. Tinako, chongjuilui, Christa adaa tina ani.

    Tak-ngai jaarra Christa ngaidam hale tharra naichangna kanmu. Taak ha leisei katho bak-a limkansir kanei mak nukko adik Christa lajet making. Phur asin-alian (lalnai, office, government, etc.,) karuk-a, kansir le jakna kannei mak nukko, Pathian Thavang keijiang la ommak. Nulepaa chong juiluiya hale manrit luiya kaom nukko, Pathian chitlui mi kani. Asat-a church maikunga athianga mui roiluiya sangram kanchang nukko, Pathian chong thui saa mashing. Ulian hale atar atur ngai chitjak kanei mak nukko, Pathian chong amasak lajet making. Katorjui, kaneijui, katheijui tia kaman kanlian nukko, adik Pathian jet making hale Pathian lungthak ha keijiang om rashe katina ani. 

    Pathian chongtan hi tute khat ningomke loitor nonashing. 

    Miring ringkhuahi paarle ramsul anga ani tia Petar ning ati (1. Petar 1:24). Hapkhatjak kanring sunghin adik Christa tokluiya, Bibol aviar kanpaa, aviar kanlam, aviar kanpek han kanlung kanman khop-a kanijui kankanti nukko Puma mel  muno nasing. Ajaarko, Pathian chongtan hi tute khat ningomke loitor nonashing. Ramual chunga kanvar-kansin, kannei rakip hale thiamna-chingna rakip hi ilamang verrang ani. Taak ha, Christa lungdo tho mi hako mangno ning. ”Ramual deina rakip hi achuoi, taak ha Pathian lungdo tho mi hako aom thengpet.” 2 Johon 2:17.

    Christa ha adik-a tak kan ngai nukko kan endaa ommak.  "A-u anai a-enda mihako mithat ani: tu-tu achanga, mithatpu jiang amonglui ringna omak tihi nanjet saake". 1Johon 3:15.

    Christian kani kata kalung kaman ngam irra, kan Aimol ule-nai masiam kan endaa jaarra meikhur katum ranghi chitrang asuak.

    Chitnaa omak mo? Christian kani kata kalung kaman ngam irra, kan Aimol ule-nai masiam kan endaa jaarra meikhur katum ranghi chitrang asuak. Arak-a lung thonrang asuak. 

    Endaa le lungsiat omchunna jotmak lungkhat-a.

    Endaa jaarra Pathian lungthak kandui rang ani. Endaa le lungsiat omchunna jotmak lungkhat-a. Siadnale tak-ngai omchunna jotmak. Siadna tihi ruk, leisei ngaijak nimak. Lungsunga mankanlian, mi esel, mi enda, etc., ngai hiom ani. Siadna masak jetrei, maakrei hale, adik tak-ngaile kanroiya adik Christa juirei!