By: - S. Sangkai Aimol (O.T. Committee)
    Innsuung, khuo, ankhat-om Rup (Society) ankhat manlian masaang, mankansown antihi avaniduoi ko changmak. Aphutna angeerna (foundation) ha maan mansat manchet bak luija vakansown, valianna jowtmak. Kan innpaal, Kankhopaalla kan Society hi ijamo anile kaman kansownrang, kanman lianrang tihi asat-ah athuuk-ah ngaidon rang ngai. Oh, Simlei chunga kanlung ngaidonna kan angvermak ajowt. Hava ikan angmak nuk juija, mi herkhat ning kumkum ma kan innpaal khuo Society avakansown, avalian (Develop) a-om. Hale tu-ang mi aviarin akan sownchillui amunmunna om hiom kanlui om rangmo ti ajowt. Hiva hin enrei alianna nangaidon le alianna ahong, aseenna nangai donle aseenna ahong antina om a-om, ha kantile alamde buija alianna ngaidon jel keke-rei tinako changmak. Kanlung ngaidon nahi manlian rang man champakrong irakip-ah chuan khat kanvar kaara simphoai muur sownna kellanghi tokrem luirang. Asat adikna aneenko abailamma kanbowmrang. Mining jet laima, theilaimak nati nanti tia ajet, aching puonarang mi chunga kherluirang. Mi ihongvar ha lungthiang hi-aija sanrang bowmrang hi angai ani. Nuk-a akansial kaara “hako keiko katije” tija mi chunga nontak chong rinarang kanlung ngaidonna ruuk-ah hoilui rang. Ahongvar nang kein nom mining abai lamma anna juitor narang chuanha varrang. Achamche, ator tiang ah risiat tholuirang. Hianghin kan ABA hijom manlian man saangrei kanti aninko irakip-a ngepraija aluteer rakip in chong kanriluirang. Chong aseen teth han aching abaan kaidarra manlianna tholuirang asatna kati. Lung thianga, achampak-a chuan kanput, chong kari kaara valian, vasaang nati, vakan sown nati, kan Society, kan ABA hi.

    Hiva The First Triennial Conference ABA hi 8th-12th Feb. 2018 na Kha-Aimol Baptist Church ning host an-nachangpeja ahui tak-ah thona kanluinei jui. Theme: “To dwell together in Unity” Ps.133:1, Speaker:

    1. Rev. S.R. Onesimus, Finance & Property Secretary MBC.
    2. Rev. Boipu Aimol, Youth Secretary, MBC.

    Hiva The First Triennial Conference hi ABA sunga aom Biakrup rakip ning ankhat jak om vatluia participate nan nahong thope jarra Biakrup rakip chunga kaningsatna kanphuong. Adik tak-a hiva The First Triennial Conference hi kantho tor lailuirang mo tia Assembly staff le Executive Staff ning kanning aluidong, kanthawai aluipong tak aninum, Pathian lungsiat na jarra kan Biakrup changpui Kha-Aimol Baptist Church ngaining tha-nom tak-a le ningsat, ningsat tak-a hiva 1st Triennial Conference tho kanti tia thounasat tak-a annajotpea ahuitak-a thotorna kanluinei ani.

    Kha Aimol Biakrup mipui chunga Pathian ning amongtibuia ravansatna phual apek changrase.

    Hiva The 1st Triennial Conference sunga speaker ngai jiang anphut Pathian chong aman tam-tak, ahui tak-a an-naripe, mirakip in kan-ngai ja lungkhop aom, Spiritual tianga kansonnale rat-puina kannei rangke tia asang tak-a ngaidonle kanroia tak-ngaina kanei. Pathianin soiluia ara aman-om rangke tia kangaidon.

    Hiva The First Triennial Conference ranga DONOR anapek inshung mirakip chunga ABA Assembly staff le Executive staff on behalf of Aimol Baptist Association ning kan-ningsatna kanphuong. Kan Association sunga hiva anga pekna tianga lungdo-lian an-om jarra Triennial Conference hi kanthotor ani. Donor ahongpek inshung mirakip chunga Pathianin amongtibui-a ravansatna phual apek changrase. 

    Hiva donar ahongpek jak niluia Triennial Conference sunga sumle-sial, sanaruphai, ponle-diar, ahongpek mi tam tak kan-om, hiva ngai rakip chung-am Pathianin ravansatna phual anapek changrase. Hiva The 1st Triennial Conference anga next (aban-na) The Second Triennial Conference 2021, hin ahuia kanthotor ret naranga Pathian jiang lamna neirei.

    The 2nd Triennial Conference thona laom mak. Pastor lungdo lian kan-om inko kan church a thokanti tia chong nan-nahong pek achang inko atam-tak ningsat omnati. Mipuining hiva 2nd Triennial Conference ranga Pathian lamna neirei. Kanning mandong marei soiluija Pathianing asat na nahong var nati.
    HIVA THE FIRST TRIENNIAL CONFERENCE SUNGA ORDAINED PEKNA ANLUINEI NGAI
    Pathian lungsiat jarra hiva Triennial sunga, Aimol Baptist Association (ABA) ning miring ranga (5) ORDAINED pekna kanlui nei hale miring angkhat (1) hi PRE-ORDAINED ani.
    Hava ngai hako:
    1. Rev. Tr. Wannoithang Aimol – Kha Aimol B/C
    2. Rev. Leivon Heli Aimol – Chingnunghut B/C
    3. Rev. S. Daniel Aimol – Chingnunghut B/C
    4. Rev. Kh. Chungneireng Aimol – Kumbirei B/C
    5. Rev. Ln. Neichungkam Aimol – Kumbirei B/C
    6. Mr. Suamneithang Saithuvai, Licentiate Pastor – Dorbinship B/C (Assam) 

    THE FIRST TRIENNIAL CONFERENCE 2018
    Song Competition & Bible Recitation Result
    1. Song Competition Result:

    Group (A)
    1st – Kha Aimol Baptist Church
    2nd – Chingnunghut Baptist Church
    3rd – Kumbirei Baptist Church & Ngairong Baptist Church

    Group (B)
    1st – Louchulbung Baptist Church
    2nd – Kharam Thadoi Baptist Church

    2. Bible Recitation Result:

    1st – Satu Baptist Church
    2nd – Chingnunghut Baptist Church
    3rd – Kumbirei Baptist Church

    There is a  time for everything, and a season for every activity under heaven.  Hiva kanomna ramual chunghin erakip aphat aom. (Ecclesiastes 3:1-8)

    Pathian lungsiat a athar-ra hiva chongsem hi veikhat keisotheina phat kamuthei ret jarra ashang tak-a Pathian kamanpak. Hiva Bible sunga kanmu anga atun phat lai tak hin nangle kei ning ejamo kanlaom, emo nalangaidon, tun lai phat hin khat le khat kanrisiat narang phat nilaimak, Pathianle kanroia omma ringkho neimanrang phat anijui. Tunlai ramual chung hin nikhat-nikhat-a ahongkansohn, ahonglian anijui. Hiva jarra hiva anga phat hin nangle keining ringkhohi kanneimanna kan om ani. Pathian lungdo-a omnarang phat anijui. Ramualhi chingna, thiamna ning ahongsip anijui. Hiva lai tak hin keini ning Pathianle kanroia omnarang ngaidon tarei. Nang naringkhoha ejamo kan-an-rang phat anijui.

    Chongsem hi asat nianga apha-aphat a kankeiso tornarang mipuining lamna nahong neipe ruh. Hale tu-tu nan-ninum `Article` ahapjot nan om aninko office assistant jiang nahong pek ruh. Chongsem anphut keini ning khat-le-khat chunga mathokna chong aom inum mankan jet rei. Hiva chongsem hi tha manlia (4 month) veikha- khat kanphuong, kan-keisorang ani. Chongle-la athar-athar hapnarang nakanning pe-ruh.